کەنەدا بۆ هاووڵاتییانی: مەچن بۆ ئیسرائیل
کەنەدا هاووڵاتیانی خۆی ئاگەدار کردەوە، کە خۆیان لە هەموو جۆرە گەشتێک بۆ ئیسرائیل بە دوور بگرن و ڕایگەیاند "شەڕی چەکداریی هەڕەشە لە ئاسایش ناوچەکە دەکات".
ئاژانسی ڕۆیتەرز بڵاوی کردەوە، حکوومەتی کەنەدا لە ڕێنماییەکانی گەشتکردن بۆ ئیسرائیل ڕایگەیاندووە "ڕەنگە بەبێ ئاگادارکردنەوە دۆخی ئەمنی زیاتر تێک بچێت".
ئاماژەی بەوەش کردووە "ئەگەر شەڕە چەکدارییەکان چڕتر ببنەوە، ئەوە ڕەنگە کاریگەریان لەسەر ئاستی بازرگانیش هەبێت، هەروەها دەبێتە هۆی پچڕانی گەشتەکان، لەنێویاندا داخستنی ئاسمان و هەڵوەشاندنەوەی گەشتەکان".
دوای کوژرانی ئیسماعیل هەنییە، سەرۆکی مەکتەبی سیاسیی بزووتنەوەی حەماس، کە لە سەردانێکیدا بۆ تاران لە شوێنی حەوانەوەی خۆیدا کوژرا، مەترسی پەرەسەندنی ئاڵۆزییەکان لە ناوچەکەدا زیاتر بووە، ئێران و میلیشیاکان هەڕەشەی هێرشکردنە سەر ئیسرائیل دەکەن.
ئیسرائیل تێوەگلانی خۆی لە کوشتنی هەنییە ڕانەگەیاندووە، بەڵام شەوی سێشەممەی ڕابردوو کوژرانی فوئاد شکور، بەرپرسێکی گەورەی حزبوڵڵای لوبنانی لە ئەستۆ گرت، ئەمە جگە لە کوشتنی ئەم دواییەی محەممەد زەیف، کە بەرپرسێکی بزووتنەوەی حەماس بوو.